Foefieslaaid-vreugde tydens gister se amptelike opening van die veelbesproke Mossel Bay Zipline by die Poort - die langste foefieslaaid ter wêreld oor die see.
Die weer het gelukkig saamgespeel om dié luisterryke geleentheid behóórlik te vier en tientalle mense het van 10:00 af met kameras en selfone by die Poort saamgedrom om die gebeure gade te slaan.
Die teenwoordigheid van die SAUK EN Mosselbaai se noodreddingspanne het tegelyk opgewonde afwagting en senuagtige gekorswel veroorsaak en toe burgemeester Harry Levendal boonop mik om die kabel pleks van die seremoniële rooi lint te knip, was die giggellaggies éérs aansteeklik.
Toe munisipale bestuurder Thys Giliomee die verantwoordelikheid aanvaar om eerste die 1,1 km glykabel aan te durf en dit oënskynlik ongeskonde en vrolik oorleef, was die ys gebreek en het die ander munisipale amptenare en genooides feesdriftig (sic) hul beurte afgewag om geharnas en gehelmet die sprong te waag.
(Snaaks dat die omstanders Saterdag nooit die glykabelryers hoor GIL het nie . . . was hulle dalk te skaam, te ordentlik, te bang of voorgesê om nie te raas tydens die amptelike bekendstelling nie? 
)
* Die Foefieslaaid-rit oor 1,1 km kos R450 per persoon. Ritte kan aanlyn hier https://mosselbayzipline.co.za/ of op die perseel bespreek word, en is soos enige ander adrenalien-gedrewe buitelug-aktiwiteit onderhewig aan matige weersomstandighede.
* Vereistes: Nie swaarder as 120 kg nie, nie langer as 2m nie, nie swanger nie en nie jonger as 8 jaar nie.
* Ná vele terugslae en duur tegniese oponthoude kon die foefieslaaid gelukkig betyds open vir volgende naweek se DIASFEES 2020 by Santosstrand. Alle vertonings is boonop GRATIS en gewilde sangers soos Demi Lee Moore, Juanita du Plessis, Vernon Barnard en ander sal vanjaar vir die eerste keer hier optree. Kyk onder foto's hieronder vir die volledige Dias 2020 verhoogprogram.
Comments